Thursday, 21 May 2015

மாறும் இயல்போ


மலை போலும் நிலைகொண்டு
.. மாறாது எதுதானும்
.. மாவுலகில் நிலைப்பதுண்டோ
கலை கொண்ட வாழ்வதிலும்
. காணுபவை எல்லாமே
.. கரைகாணும் வரை நிற்குமோ
அலை என்று மனம்கூறி
.. ஆக்கியதோ இந்நாளில்
.. அக்கரை பச்சை யென்றே
நிலைகொண்டு திசை மாறின்
.  நீதியிலை எனநீயும்
.  நெஞ்சமே அழுவதேனோ

தலைகொண்ட விதியென்று
.  தகுதிக்கே ஒவ்வாத
..  தரம்காண ஏற்றும் விதியே
விலையென்று வகைகூறி
. விற்கவெனப் பொருளீந்து
. விற்றபின் வேண்டிநின்றால்
குலையென்றே ஒன்றாகக்
. கூட்டாக வாழ்ந்தும்பின்
. கூறாமல் விட்டும் ஓடும்
நிலைகொண்ட வாழ்வுமிது
. நெஞ்சமே  நீ ஓடும்
. நிலை தன்னைக் குறை கூறவோ

சிலையென்று கணம்தானும்
. செய்வதும் அறியாது
. சிந்தனை மருகி நின்றே
உலையென்று கலைபேசும்
.  உள்ளமென்ப தோய்வின்றி
.  உலகெங்கும் தேடிஓடி
இலையென்றும் ஆனபின்னே
..  இருப்பதுமென் இல்லாமை
.  இருப்பதே இயல்பொன்றாக
தொலை தூர அடிவானில்
.  திகழும் அனல்கூடும்வரை
.  திடமும் கொள் எந்தன்மனமே

No comments:

Post a Comment